Nagpadayon ang Davao City Library and Information Center (DCLIC) Mobile Library sa pagdala og mga libro ug edukasyonal nga kahimanan sa mga souk nga tulunghaan ug barangay.
Sukad sa pagsugod niini niadtong Agosto sa miaging tuig, nakabisita na kini og 88 ka public schools, 38 ka daycare centers, ug unom ka managlahi nga mga pasilidad, lakip na ang usa ka drug rehabilitation center, Lingap Center, ug balay sa mga senior citizen.
Nakabisita na usab kini sa siyam ka mga private school.
Sumala pa ni DCLIC-Bookmobile ug Disaster Education Head nga si Arniel Enoc, nga ang mga lugar sa Marilog ug Paquibato nga lisod maabot sa city’s main library mao ang gitagaan og prayoridad sa pagbisita.
Ang mga aktibidad sa mobile library naglakip sa storytelling, pagbasa og libro, mascot ug puppet shows, disaster preparedness training, basic life support education, ug uban pang interaktibo nga kalihokan alang sa mga magtutungha gikan Grade 5 hangtod high school.
Gipadagan ang programa gamit ang tulo ka mobile libraries susama sa Disaster Education Bus alang sa mga magtutungha sa elementarya ug high school, Green Bus alang sa mga magtutungha sa Grades 3 hangtod 6 ug ang Blue Bus alang sa mga nursery children.
Gipasiugda ni Enoc nga adunay usab kini film viewing nga naglakip sa mga istorya nga adunay moral lessons.
Ang DCLIC nagkoordinar sa Department of Education alang sa mga pagbisita sa public schools, samtang, ang mga private schools mamahimong mag-request sa pagbisita pinaagi sa pag-email.
Gipahibalo usab niini nga ang Mobile Library magbisita sa public schools ug barangays gikan Lunes hangtod Huwebes, samtang, ang Biyernes alang sa mga private schools, Lingap Centers, ug balay sa mga senior citizen.
