Miplastar ang Davao City isip ika-4 nga labing maayong startup ecosystem sa Pilipinas ug nanguna sa rehiyon, base sa Global Startup Index sa tuig 2024. Kini bunga sa paningkamot sa kagamhanan nga mapalig-on ang ekonomiya sa siyudad pinaagi sa pagsuporta sa mga negosyong naggamit og teknolohiya nga adunay dakong potensiyal sa pagtubo.
Sumala ni Christian Cambaya, lider sa Investor Assistance Servicing Unit sa Davao City Investment Promotion Center (DCIPC), nagsugod na nga mahimong sentro sa mga makabag-ong negosyo ang Davao. Aron masuportahan kini, gipasiugdahan sa siyudad ang Davao Angel Investors Network aron mapadasig ang pagpamuhunan sa mga lokal nga startups.
Tungod niini, padayon nga naningkamot ang kagamhanan sa Davao nga mapalambo ang startup ecosystem sa siyudad pinaagi sa mga inisyatiba nga mosuporta sa teknolohiya, inobasyon, ug pagpamuhunan, nga naghatag og mas daghang oportunidad sa mga negosyante ug investors.
