Gipahinumdom sa Davao City Health Office ang publiko bahin sa mga sintomas nga angay bantayan kalabot sa Monkeypox o MPOX, nga naghatag og kahadlok karon sa katawhan.
Lakip sa mga timailhan niini mao ang hilanat, panit nga namula o adunay rashes, kasakit sa tutonlan, kasakit sa kaunuran ug likod, ug pagsakit sa ulo.
Giklaro usab nga kini nga sakit tataw nga makatakod, apan aduna’y mga pamaagi aron nga malikayan nga matakdan, sama sa pagtabon sa baba kung mo-ubo o mo-hatsing, pagpaniguro sa maayo nga airflow, kanunay nga paghugas sa kamot o paggamit og alcohol o hand sanitizer, ug paglikay sa mga tawo nga adunay sintomas.
Sa karong bulana kung kahinumduman, aduna nay natalang kaso sa MPOX sa Davao City, hinungdan nga gipasidan-an ang mga Dabawenyo nga magbantay ug kanunay nga magmaigmat, aron nga malikay ang kaugalingon sa posibleng kapeligrohan.
