DAVAO CITY – Gikatakda sa lokal nga panggamhanan ang pagpahigayon ug employees’ day ngadto sa 12,000 personnel. Gikanayong tibuok adlaw kini nga ipahigayon sa mosunod nga semana, Marso 14 diin panahon usab sa pagsaulog sa Araw ng Dabaw.
Segun ni Erwin Alparaque, Human Resources and Management Office head, ang nahisgutan nga event adunay gitagana nga mga cash prizes nga mokabat sa P35,000 isip reward sa mga empleyado tungod sa ilang pagpaningkamut nga mahatagan ug serbisyo ang lokal nga panggamhanan.
Kalakip sa mga naka-schedule nga events ang gilangkuban sa zumba, pinoy games, indoor ball games, free medical checkups, free haircuts ug hair styling, duet competition, health and wellness checkups, dance contests, ingon man cheer dance competition.
Nasayran nga ang dakbayan sa Davao adunay 2,459 plantilla personnel, ug 7,450 job orders ug contract of services workers.
Dugang ni Alparaque nga kung mag-ulan sa mosunod nga semana atol mismo sa selebrasyon, ipahigayon nila ang maong event sa Davao City Recreation Center (kanhi Almendras gym).
