Nadepensahan human nagkampyon ang Davao City Durians ug naangkon ang bulawang medalya atol sa panagsangka alang sa dulang basketball secondary boys sa score nga 71-50. Gipahigayon ang dula kaganihang buntag sa Rotary Gym dakbayan sa Tagum, Davao Del Norte atol kini sa naghinapos nga DAVRAA meet 2026.
Sa unang kwarter pa lamang sa dula, gidomena na sa Durian boys ang kalamangan diin gibiyaan pa og halos 20 puntos. Hangtod sa pag-abot sa second half napabilin gihapon sa Davao ang pagkontrol sa dula batok sa Davao De Oro Golden Thunder Bolts.
Gisulayan pa og apas sa Golden boys ang biya niini samtang nagkagamay na lamang ang oras pinaagi sa perimeter shots ug 3 point shots apan napakyas gihapon kini sa ilahang tinguha nga maapsan ang Davao City Durian.
Naangkon sa Davao De Oro Golden Thunder bolts ang Silver medal. Nasayran nga sa nakalabay nga tuig nagtigi na usab ang duha ka team sa finals. Samtang gidagsa usab sa mga fans ang maong Championship Match ug gipakita ilahang kadasig ug suporta tali sa Davao City ug Davao de Oro sa Secondary Basketball category sa DAVRAA Meet 2026.
Samtang alang sa secondary Girls basketball Championship Match, naangkon usab sa Davao City Durians ang bulawang medalya human nga gipildi ang Davao De Oro Golden Thunder bolts sa score nga 91-55.
