DAVAO CITY – Gidasig sa usaka opisyal sa Davao City COVID-19 Task Force ang katawhang dabawenyo nga i-dokumento ang ilang vaccination experience ug i-post kini sa social media aron masiguro nga nakadawat gayud kini ug bakuna, ug sa samang higayon madani ang uban nga magpabakuna usab batok covid 19.
Gipagawas ni COVID1-19 Task Force Spokesperson Dr. Michelle Schlosser ang nahisgutang pahayag human mikatag sa social media ang usaka video nga nagpakita nga igo lamang gitusok ang dagom sa vaccinator ngadto sa buktong sa iyang gibakunahan.
Gikanayon ni Schlosser nga makasiguro ang mga dabawenyos nga nahatagan kini ug covid 19 vaccine pinaagi sa pagtan-aw niini gamit ang video samtang gihimo ang proseso ngadto kanila.
Apan alang niadtong mga mahadlok nga motan-aw sa actual nga pagtusok sa dagom, gikanayon sa opisyal nga mabati ang pagsulod sa medisina sa higayon nga ma-inject na kini sa bukton.
Isip kabahin sa documentation sa vaccination process, gidasig usab ang katawhan nga kuhaon ang mga pangalan sa mga vaccinators.
Gitin-aw ni Schlosser nga gihatagan ug dakong pagtugot ang pagkuha ug mga video ug litrato sa vaccination site, ug dili kini mag-atubang sa pagka-aresto.
