Gipahibalo sa Ecoteneo, usa ka environmental group, nga napugos na lamang ang mga petitioners sa pagduso og Writ of Kalikasan isip ilang kataposang lakang batok sa Samal-Davao bridge project.
Matod ni Carmella Santos, Ecoteneo Director, sukad pa sa tuig 2022 sila naningkamot nga makigkoordinar sa Davao City Council aron hisgutan ang epekto sa maong proyekto sa kinaiyahan.
Apan, dugay pa kuno mitubag ang konseho ug duha ka tuig pa ang nilabay ayha nakapaguwa og committee report niadtong milabay nga tuig.
Sumala sa Ecoteneo, kun gitagad pa sa konseho ang ilang mulo kabahin sa proyekto, dili unta sila napugos sa pagsampa og writ.
Gipadugang ni Santos nga ang ilang hangyo, nga dunggon sila ug tagaan og alternatibo nga plano nga mas protektado ang kalikupan, mao ra unta ang ilang gipaningkamotan.
