Giaprobahan sa Davao City Council ang pag-usab sa City Ordinance No. 0334-12, nga magpadugay sa validity sa Motorized Transport Operator’s Permit (MTOP) fee ngadto sa duha ka tuig, aron danihon sumala pa ang daghang mga operator ug tag-iya sa motorsiklo nga magkuha og prangkisa.
Ang amendment nga gi-aprubahan sa ikatulo ug katapusang pagbasa, nga nagpasabot sa mga benepisyo niini alang sa mga operator.
Ang maong extension maka-menus sa mga tag-iya og hangtud 50% gumikan, dili na matag tuig ang bayad apan, mubayad na lamang kini og kausa matag duha ka tuig.
Ang tumong sa amendment mao ang pag-ingganyo sa daghang operator nga magparehistro ug aron malikayan ang dugang problema sa mga drayber ug pasahero ilabi na kung magka-aksidente, gumikan sa kapin 25,000 ka mga motorsiklo alang sa paga-arkila, 7,000 ra ang narehistro ug 800 ra ang adunay franchise.
Ang sunod nga lakang sa implementasyon mao ang pagperma sa City Mayor sa maong amendment.
Alang usab sa mga pangutana bahin sa MTOP, ang mga operator ug tag-iya mamahimo nga mubisita sa Motorized Vehicle Franchise and Regulatory Division sa City Transport and Traffic Management Office.
