Gipasigarbo ang dako nga kalambuan sa transport infrastructure sa Davao City pinaagi sa 45.5-kilometro nga Davao City Bypass Road. Sa kasamtangan, hapit na matapos ang underpass sa Mudiang, nga usa sa mga nag-unang pasilidad ilawom sa maong proyekto. Dugang pa, mga viaduct structures usab ang itukod aron maserbisyohan ang mga bukirang dapit sa Mudiang ug Tibungco.
Kabahin sa Package I-1 (10.7 kilometro) mao ang 2.3-kilometro nga tunnel nga sa dili madugay mahimong pinakaunang long-distance mountain tunnel sa tibuok Pilipinas. Ang tibuok bypass project gibahin ngadto sa unom ka package, nga adunay kinatibuk-ang gilay-on nga 45.5 kilometro. Gani, ang gasto sa maong proyekto mokabat og P46.80 bilyon nga gipundohan ubos sa Special Terms for Economic Partnership (STEP) Loan sa panag-uban tali sa Pilipinas ug Japan International Cooperation Agency (JICA).
Pagkahuman sa proyekto, gilauman nga mokunhod ang biyahe gikan sa Toril, Davao City paingon sa Panabo City, Davao del Norte nga gikan sa kasagarang duha ka oras ngadto sa ubos sa 49 minutos na lang ang biyahe. Gilauman usab nga kini makapahupay sa grabeng trapiko sa amihanang bahin ug sa downtown area sa dakbayan. Ang proyekto usa ka dakong lakang sa padayon nga urban development sa Davao.
