DAVAO CITY – Andam na ang Davao City COVID 19 Task Force alang sa roll out sa booster shots alang sa edad nga 12 anyos ngadto sa 17 anyos nga age group ugaling aduna nay guidelines gikan sa Department of Health.
Sumala sa tigpamaba sa COVID 19 Task Force, Dr. Michelle Schlosser, sa kasamtangan, wala pay nadawat ilang buhatan nga guidelines ug kompirmasyon gikan sa DOH.
Apan sa higayon nga muhatag na og “go signal” ang ahensya, mamahimo na lamang matud pa nga paspas ang VACCINATION cluster alang sa pag-roll out sa booster shot sa maong age group tungod operational pa ang mga pampublikong COVID vaccination sites dinhi sa syudad.
Sumala kang Schlosser, susama sa nag-unang COVID vaccination rollout alang sa ubang population age groups, mauna gihapon usab ang Metro Manila ayha kini ipatuman sa ubang rehiyon.
Sukad niadtong Hunyo 17, anaa na sa 137,786 ka mga bata nga anaa sa pangidaron gikan 12 anyos ngadto sa 17 anyos ang nakadawat na og 2nd dose gikan sa target nga ihap nga 191, 998.
Samtang, gipakusgan pa sa Vaccination Cluster ang school-based mobile vaccination, diin dili lamang 12-17 anyos ang taget niini, apan lakip sab ang mga edad nga anaa sa 5 anyos ngadto sa onse anyos nga age group.
Samtang, ugma, Hunyo 24, mulusad sila og simultaneous schol based- mobile vaccination sa tulo ka elementary school sa tulo ka distrito dinhi sa sa dakbayan sa dabaw.
Via || Hana Rallos
