Pormal na nga misugod ang preparasyon sa Davao City alang sa BYD IRONMAN 70.3 nga ipahigayon sa Marso 22, 2026, human mapirmahan ang kasabutan tali sa City Government, Sunrise Events, ug mga nag-unang sponsors sa usa ka seremonyal nga kalihukan niadtong Huwebes.
Mosulod na sa ikalimang edisyon sa syudad ang prestihiyosong international triathlon nga gilauman nga magdala og world-class nga mga atleta, dako nga benepisyo sa turismo, ug dugang nga kasinatian sa pag-host sa dagkong sports events. Gibana-bana nga molambo pag-usab ang lokal nga ekonomiya tungod sa pagsulod sa mga lumulupyo, bisita, ug mga participant gikan sa lain-laing nasud.
Sumala kang City Administrator Atty. Francis Mark Layog, dako ang papel sa maong kalihukan sa pagpadayon sa imahe sa Davao City isip usa ka buhi, luwas, ug globally competitive nga siyudad. Iyang gipasiugda nga ang maong lumba dili lamang para sa sports kundili usa usab ka paagi sa pagpalapad sa dungog sa Davao City sa international stage.
Padayon na usab ang koordinasyon sa city government, ilabi na sa safety and security cluster, aron masiguro ang kahapsay sa lumba ug kaluwasan sa mga atleta, spectators, ug residente. Gibutyag ni Layog nga 24/7 ang trabaho sa security cluster lakip ang disaster response, medical teams, ug traffic management aron malikayan ang bisan unsang insidente atol sa kalihukan.
Pinaagi sa mensahe ni Mayor Sebastian “Baste” Duterte nga gibasa ni Layog, gipadayag nga usa ang IRONMAN 70.3 sa mga pinakahinungdanong kalihukan sa selebrasyon sa Araw ng Dabaw. Gilauman sa city mayor nga mamahimong plataporma ang lumba aron ipakita ang mainitong pagdawat ug panaghiusa sa mga Dabawenyo sa mga bag-ong bisita ug balik-balik nga atleta.
Gipadayag usab nga ibalik karong tuiga ang Tribung Maisugon Award, usa ka pag-ila nga naghatag og pasidungog sa 11 ka ethnolinguistic groups sa Davao City. Pinaagi niini, mas mapalalom ang mensahe sa kalain-lain ug panaghiusa nga gipasiugda sa syudad.
Samtang nagpadayon ang mga pagpangandam, gikatakda nga ipahigayon ang tanang swim, bike, ug run segments sulod sa Davao City, diin agianan ang Davao Coastal Road, ang tin-aw nga tubig sa Talomo Bay, ug ang hulagway sa Bukid Apo isip talagsaong backdrop sa lumba, usa ka kombinasyon sa sports, kinaiyahan, ug kultura nga gilauman nga mopabilin sa kasingkasing sa mga moapil ug motan-aw.
