Giila ang Dakbayan sa Davao isip ikaduha sa listahan sa “Safest Cities in the Philippines for Travelers” base sa pinakaulahi nga resulta sa World Travel Index alang sa tuig 2025.
Kini nga report usa ka dako nga timailhan sa padayon nga paningkamot sa lokal nga kagamhanan sa pagpatuman sa kalinaw, kahapsay, ug seguridad alang sa mga lumulupyo ug bisita sa dakbayan.
Gikan sa napulo ka mga syudad nga gilista, ikaduha ang Davao City nga nakakuha og taas nga score nga 80.73%, hinungdan nga nasulod kini sa top tier sa mga lugar nga girekomenda nga adtoan sa mga magpapanaw.
Nag-una sa listahan ang Dumaguete City nga adunay labing taas nga score nga 81.36%, samtang ikatulo ang lalawigan sa Bulacan nga nakakuha og 76.42%.
Ang ubang mga syudad nga naapil sa top 10 mao ang Balanga sa ikaupat nga pwesto, gisundan sa Lucena, Naga, Baguio, Puerto Princesa, ug Legazpi City.
Ika-napulo sa listahan ang Makati City, nga naila isip usa sa mga sentro sa negosyo sa nasud.
Ang maong ranking nagpakita sa kalig-on sa seguridad ug turismo sa maong mga lugar, nga nakahatag og masaligan ug kombinyenteng kasinatian sa mga turista.
Sumala pa sa mga opisyal sa Department of Tourism, nga ang maong ranggo usa ka dakong kalampusan nga nagpamatood sa kredibilidad ug kapasidad sa mga lokal nga panggamhanan sa pagprotektar sa ilang mga bisita, ilabi na sa mga dakbayan sama sa Davao nga sukad pa kaniadto nailhan na nga aduna’y hugot nga kampanya batok sa kriminalidad ug illegal nga droga.
