DAVAO CITY – Nahatagan ug pasidungog ang dakbayan sa Davao isip fourth most competitive sa highly-urbanized cities category sa Department of Trade and Industry sa gipahigayong 10th Cities and Municipalities Competitiveness Summit sa miaging adlaw.
Namentenar sa Davao City ang pwesto niini sukad niadtong 2021.
Karung tuiga, nag-una ang Quezon City, Maynila, ug Pasay City isip most competitive ug highly-urbanized cities sa nasud.
Nasakmit sab sa dakbayan ang ikatulo nga pwesto sa Most Competitive in Economic Dynamism; ikaunom sa Most Competitive in Infrastructure; ikaunom sa Most Competitive in Resiliency; ika-pito sa Most Competitive in Innovation; ug ika-walo isip Most Competitive in Government Efficiency.
Kini na ang ika-walo nga higayon nga nalakip ang syudad sa maong pasidungog.
Gipasalamatan ni Davao City Acting City Administrator Atty. Francis Mark Layog ang DTI alang sa maong pagpaila, lakip ang lokal nga kagamhanan ug ang katawhan sa maong kalampusan.
Paningkamutan matud pa sa panggamhanan ang paghatud sa dekalidad nga serbisyo nga maghatud ug kalambuan sa dakbayan.
Ang Cities and Municipalities Competitiveness Summit, usa ka tinuig nga pag-ila sa DTI uban ang International Council for Small Business Philippines nga naggawad sa mga LGUs nga nakalampus sa sumbanan sa Economic Dynamism, Infrastructure, Resiliency, Innovation ug Government Efficiency.
via || Bombo LJ Florendo
