Nihatag na og katin-awan si Davao City 1st District Representative Paolo “Pulong” Duterte kalabot sa pagkalambigit sa iyang pangalan sa illegal nga droga kaniadtong 2018.
Kini gumikan sa pag-expose ni kanhi Bureau of Customs- Intel Officer Jimmy Guban atol sa hearing sa quad committee, isip testigo sa mga operasyon sa illegal nga droga sa nakalabay nga administrasyon diin sumala pa, kalakip ang si 1st District Representative Paolo Duterte, bana ni Vice Presidente Sara Duterte nga si Manases Carpio, ug ang businessman nga si Micheal Yang sa P6.8B nga shabu shipment sa nahisgutang tuig.
Sumala pa ni Guban, gibawi niini ang iyang pamahayag human nakadawat og pampanghulga kaniadto.
Apan sumala pa sa gipaguwa nga pamahayag ni Pulong Duterte, giklaro niining wala siya nakaila kang Jimmy Guban ug gipasalig niining wala usab nakaila si Guban kaniya.
Pagpaklaro pa sa opisyal, wala silay transaction o di kaha koneksyon nga maoy hinungdan aron i-apil ang iyang pangalan sa maong isyu. Dugang pa ni Pulong ngadto sa publiko nga ang pag-ila sa star witness ang nagpasabot lamang sa pagsulti og kamatuoran ug adunay kredibilidad diin sukwahi sa makita kang Jimmy Guban.
Kini tungod sa pag-contempt niini sa Senate Blue Ribbon Committee gumikan sa pagpamakak.
Alayon niini, gikanayon ni Pulong Duterte nga klaro kaayo nga walay kredibilidad si Guban lakip na ang ginabutyag niining impormasyon bisan walay basehan sukad pa kaniadto rason nga gikahibulong niini ang paghimo niining star witness.
Sigon pa sa opisyal, boot niining makita ang gipaumpaan nga salaysay ni Guban aron matun-an sa iyang abogado.
