DAVAO CITY – Gikatakdang magpahigayon ang Davao City Health Office (CHO) og dugang duha ka rounds sa anti-polio immunization alang sa tulo ka klase sa polio-virus sa Pebrero ug Marso.
Himuon sumala pa sa CHO ang paglugway sa “Sabayang Patak Kontra Polio” human nga migula ang report kalabot sa kaso sa Type 1 poliovirus sa Autonomous Region in Muslim Mindanao (ARMM).
Sumala sa hepe sa CHO nga si Dr. Joy Villafuerte, kinahanglan nga dad-on sa mga ginikanan ang ilang mga anak sa tanan nga mga health centers ug uban pang areas nga ibutyag sa CHO sa mosunod nga adlaw.
Sa milabay nga pagbakuna, nakatala ang CHO og 104% coverage sa bulan sa Oktubre hangtud Disyembre sa Sabayang Patak alang sa Type 2 poliovirus.
Gikanayong ang third round aron nga makompleto ang October – December immunization ang ipahigayon sa Enero 22 hangtud February 2.
Apan gitino ni Villafuerte nga kadtong mga bata nga nabakunahan atol sa unang tulo ka rounds kinahanglan nga mabakunahan pa gihapon sa 4th ug 5th rounds sa immunization sa February ug March.
Gitino sab sa nahisgutan nga ang first round sa immunization sakop lamang niini ang type 2 poliovirus gumikan kay kini ang klase sa poliovirus nga nadiskobrehan sa siyudad kaniadtong Agosto sa milabay nga tuig.
