Gipahibalo sa Davao City Central 911 nga kasamtangang dili makasulod ang mga tawag nga gikan sa Globe ug TM network tungod sa problema sa teknikal. Ang hotline temporaryong dili madawat ang tawag gikan sa maong mga linya.
Matud sa pamunuan sa Central 911, limitado lang sa mga tawag nga gikan sa Smart, Sun, ug Dito networks ang ilang madawat karon. Nagpasabot kini nga ang mga Globe ug TM subscribers dili usa makakontak sa emergency hotline hangtod masulbad ang isyu.
Kalabot niini, gikumpirma sab sa Central 911 nga sila nagtinabangay na karon sa kompanyang Globe aron dali nga masulbad ang problema ug mabalik ang normal nga operasyon sa serbisyo. Ingon man gihangyo ang publiko nga magpabilin nga kalmado ug gamiton ang available nga network kon adunay emerhensiya.
