DAVAO CITY – Tungod sa padayon nga mga aftershocks ning dakbayan nanawagan ang ahensiya sa City Disaster Risk Reduction and Management Office (CDRRMO) ngadto sa publiko nga kinahanglan pabilin nga alerto ug kalmado aron nga dili mabutang sa delikado nga sitwasyon.
Sumala pa kang CDRRMO head Alfredo Baluran, angayan nga pabiling kalmado panahon nga adunay kusog nga pagtay-og gumikan kay adunay posibilidad nga matumba ug mabutang sa delikado ang sitwasyon panahon nga mag-panic.
Samtang sa pikas nga bahin, Gibutyag ni Task Force Davao commander Consolito Yecla nga andam na sila nga itunol sa mga nabiktima sa linog ang ilang 10,000 ka mga food packs.
Adunay pipila ka mga grupo na sab ang midonar ug hinabang alang sa mga lugar sa Davao del Sur nga nakasinate og grabe nga kadaut tungod sa kusog nga linog.
Nakiglambigit na matud pa karon ang TFD sa mga LGUs sa Davao del Sur aron nga kini na ang direkta nga mohatag sa mga hinabang ngadto sa mga biktima.
