DAVAO CITY – Human ang pag-assess sa sitwasyon sa coronavirus disease (Covid-19) sa dakbayan, gibutyag ni Davao City, Mayor Sara Duterte-Carpio nga andam na ang siyudad nga mosibog sa modified general community quarantine (MGCQ).
Sumala sa Mayor nga sa kasamtangan, pabilin nga “manageable” ang sitwasyon sa Covid-19 sa siyudad.
Kini ang gibutyag sa Mayor human nga gi-anunsiyo ni Presidential Spokesperson Harry Roque nga ang mga local government units (LGUs) hatagan na ug oportunidad nga mo-apela kalabot sa quarantine status na buot ipatuman sa Inter-Agency Task Force on Emerging Infectious Diseases (IATF-EID).
Una ng gibutyag sa Mayor nga bisan aduna na siyay ideya kung unsa ang quarantine status sa siyudad sugod sa Hulyo 1, dili pa niya kini mamahimo nga ibutyag.
Samtang gibarugan sa Mayor nga pabilin gihapon karon nga gipatuman ang mga regulasyon kalabot sa mamahimong lihok sa mga tawo aron nga malikayan ang pagkatag sa virus.
