DAVAO CITY – Gilaumang matapos ang rehabilitasyon sa Davao International Airport karong Abril ning tuig kasamtangan.
Sumala pa ni chief engineer Sarah Jane Saladaga, unang gikanayon nga karong Marso na matapos ang rehabilitation sa north wing sa maong tugpahanan.
Apan gihangyo ang dugang pang mga oras aron makumpleto ang rehabilitasyon gumikan sa makanunayong dagsaon sa mga tawo ang tugpahanan ug ginabuhat nila ang trabaho pagka-gabii.
Pipila ka mga pasilidad ug ekipo ang kasamtangang ginamuntar karon sa Davao International Airport sama sa pagbalhin sa concessions area ug pagpahalapad sa check-in area.
Sa pikas bahin, gibutyag ni National Economic and Development Authority kon NEDA regional director Maria Lourdes Lim, wala matud pa kasumitar sa ilang guidelines ang contractor nga Chelsea Logistics and Infrastructure Holdings Corp. human nahimong epektibo ang maong hangyo.
Sanglit, walay gitaganang deadline ang NEDA 11 alang sa revised guidelines nga gikinahanglang mupailawom sa mga sumbanan kon IRR sa Department of Transportation.
Gipadali na sab ang pagrenovate sa north wing nga muakomodar sa libuan ka mga delegado alang sa umaabot nga MICECON 2023 karong Marso atol sa soft opening sa maong pasilidad.
VIA || Bombo LJF
