DAVAO CITY – Gikumpirma ni Department of Public Works and Highways (DPWH)-11 spokesperson Dean Ortiz nga usa ka government project ang Brgy- Mandug-Acacia by pass road diin nahitabo ang aksidente nga pagdahili sa yuta kagahapong adlawa diin usa ang namatay human nga natabanunan nga nailang si Harvy Mar Panes residente sa Brgy. Cabantian ning siyudad.
Nasayran sa nahisgutan nga sa milabay nga tuig 2019 pa gisugdan ang maong proyekto ug hugtanon nga ginadili ang pag-agi sa nahisgutan nga dapit sanglit delikado kini ilabi na nga nagpadayon pa ang proyekto.
Kahinumduman nga mi-agi lamang ang biktima sa lugar samtang nagbisiklita dihang kalit na lamang nga midahili ang yuta hinungdan nga nalubong kini sa ilalom.
Gitapos sab dayon ang gipahigayon nga search and retrieval operation human nasayran nga buhi ang laing duruha ka mga indibidwal nga gikatahapong kalakip sa mga nalubong.
Samtang gibutyag ni Ortiz nga kung adunay sad-an sa maong insidente, gilayon kini nga mag-atubang ug reklamo.
