Nakabsan sa kinabuhi ang usa ka 17-anyos nga dalagita human nga giatake kini sa putyukan sa Purok 2, Brgy. Fatima, New Bataan Davao De Oro. Samtang naangol usab ang inahan niini nga kauban niadtong tungura atol sa maong panghiabo.
Subay sa report, nahitabo ang insidente niadtong Huwebes diin sumala pa sa amahan sa mga biktima nga si Emmanuel Cañas, nga niadtong tungura nibisita sila sa ilahang uma. Apan sa iyahang pagpanghagbas, kalit lamang nga miatake ang putyukan ngadto kaniya og lakip na sa iyahang anak ug asawa nga anaa sa payag niadtong tungura nga nipahulay. Igo na lamang niini nga nadunggan ang mga nahisgutan nga nangayo og pakitabang.
Dali niining gisapupo ang iyahang anak niadtong tungora aron makalingkawas sa pagpangatake samtang ang iyahang asawa ang nagtabon og jacket sa ulo. Apan sa pagpalayo niini sa maong lugar uban ang iyahang anak nga iyahang gikarga niadtong tungura nabuhi-an niya kini gumikan sa pagpangataki.
Ug sa iyahang pagbalik nakita na lamang sa nahisgutan ang iyahang anak nga naputos na sa pinaakan sa putyukan kon “sting”. Dali usab nga narespondehan sa mga silingan ang mga biktima diin gidala sa ospital ang 17-anyos nga dalagita, apan wala na kini natabang pa sa mga Doktor human gideklara kini sa Doktor nga dead on arrival.
Ang nahisgutan ug asawa niini ang gi-admit sa ospital gumikan sa mga nangkon nga pinaakan sa putyukan. Nasayran nga ang dalagita, usa ka batang adunay special needs hinungdan nga pirmi nila kining ginadala kung moadto sa ilahang uma.
