Aprobado na sa konseho ning dakbayan sa Davao ang pagsira sa pipila ka mga kadalanan alang sa ‘simultaneous nationwide peace rally’ sa Iglesia ni Cristo (INC).
Karong umaabot nga enero 11, ning tuiga, adunay ipahigayon nga pagsira sa dalan nga makaapekto sa San Pedro Street, C.M. Recto Avenue, Pelayo Street, Iñigo Street, C. Bangoy Street, Rizal Street, Bonifacio Street, ug Palma Gil Street gikan kini alas 9:00 sa gabii hangtud sa alas 4:00 sa kabuntagon sa Enero 12.
Samtang karong Enero 13, himuon ang “full and total road closure” sa susama nga mga dalan magsugod kini alas 8:00 sa buntag hangtud sa mahuman ang programa.
Sa susama nga adlaw, kasamtangan sab nga isara ang Davao City Coastal Road gikan sa Tulip Drive padulong sa Bago Aplaya.
Sumala pa ni Bong Estudillo, regional legal officer sa Davao Region sa INC, nga ang tumong sa rali alang sa kalinaw, gumikan niuyon matud pa ang INC sa sentimento ni Presidente Ferdinand “Bongbong” Marcos Jr., kinsa supak sa impeachment ni Bise Presidente Sara Duterte.
Dugang pa niini, nga kapin sa 300,000 ka miyembro sa INC gikan sa Davao Region ug Soccsksargen ang motambong niini.
Samtang, gisiguro usab ni Dionisio Abude, pangulo sa City Transport and Traffic Management Office, nga bisan paman sa kasamtangan nga pagsira, ang mga dalan mamahimo gihapon nga maagian sa mga behikulo.
Gipklaro sab niini, nga ang ilang buhatan, wala misupak sa pagsira gumikan ang mga dalan mao na kini ang ginagamit sa dakbayan sa mga kalihukan, susama sa Araw ng Dabaw ug Indak-Indak sa Kadayawan.
