Gilauman nga mosaka na usab ang presyo sa mga produktong petrolyo sa sunod nga semana tungod sa pagtaas sa presyo sa krudo sa kalibutanong merkado. Sumala pa sa inisyal nga pagtantiya base sa upat ka adlaw nga lihok sa Mean of Platts Singapore o MOPS ug foreign exchange, gilauman nga mosaka og P6.00 hangtod P6.50 kada litro ang presyo sa diesel, samtang posibleng madugangan og P5.50 hangtod P6.00 kada litro ang gasolina.
Dugang pa niini, giingon sa mga tinubdan sa industriya sa lana nga misaka pag-usab ang presyo sa krudo sa internasyonal nga merkado tungod sa kabalaka sa posibleng pagsamok sa suplay sa enerhiya. Lakip sa nakaapekto niini ang limitado nga pag-agi sa mga barko sa Strait of Hormuz ug ang nagkadakong hulga sa seguridad sa Bab el-Mandeb Strait nga nakaapekto sa global nga suplay ug negosyo. Kahinumduman nga kasagarang ipahibalo sa mga kompanya sa lana matag Lunes ang ilang price adjustment, nga ipatuman dayon sa sunod nga adlaw.
Sa miaging semana, epektibo niadtong Hulyo 21, gipatuman sa mga kompanya sa lana ang dugang presyo nga P3.50 hangtod P3.65 kada litro sa gasolina, P10.00 hangtod P10.68 kada litro sa diesel, ug P11.60 hangtod P11.77 kada litro sa kerosene.
Sa kasamtangan, miabot na sa kinatibuk-ang P49.92 kada litro ang net increase sa presyo sa gasolina, P50.43 kada litro sa diesel, ug P48.39 kada litro sa kerosene human sa sunod-sunod nga oil price adjustments karong tuiga.
