DAVAO CITY – Mihatag ug katin-awan si Davao City Mayor Inday Sara Duterte-Carpio nga wala naka-lockdown ang dakbayan sa Davao apan adunay pipila ka mga sumbanan nga kinahanglan tumanon ilabi na kadtong mga nagabiyahe.
Sa gipagula nga guidelines, tanan nga mga residente sa dakbayan gidid-an nga mogawas sa siyudad isip lakang aron nga makalikay sa Corona virus disease (Covid-19).
Tanan nga mga mibisita sa dakbayan nga magpabilin lamang sulod sa pipila ka adlaw kinahanglan na nga mobalik gilayon sa ilang mga dapit kini aron nga malikayan ang posibilidad nga matakdan.
Nanawagan sab ang lokal nga panggamhanan sa mga travelers nga i-postpone una ang pagbisita o pagbiyahe sa mga lugar hangtud nga wala pa gitapos ang pagpatuman sa State of Public Health Emergency.
Sumala pa kang Mayor Sara, gihimo ang nahisgutan nga sumbanan gumikan kay limitado lamang ang mga medical facility sa dakbayan ug dili maakomodar ang tanan nga mga pasyente sa higayon nga kalit na lamang nga mosaka ang ihap sa mga indibidwal nga matakbuyan sa sakit.
