DAVAO CITY – Gibutyag ni Dr. Ricardo Audan, chief of clinics sa Southern Philippines Medical Center (SPMC) nga nagpabilin pa karon nga gawasnon ang dakbayan sa Corona virus disease (Covid-19).
Hinuon gikanayon sa nahisgutan nga sa kasamtangan anaa na sa kinatibuk-ang 42 ka mga Person Under Investigation (PUIs) ang ilang gi-atiman diin sa nahisgutan nga ihap, 20 niini ang negatibo. Kagahapon, 22 ka mga PUIs ang anaa sa SPMC diin 6 niini ang anaa sa Isolation Facility, upat ang sa ICU-1; ug 12 ang sa payward-1.
Gitataw sab ni Dr. Audan nga sagad sa ilang gimonitor nga mga PUIs ang anaa na sa maayo ang kahimtang.
Gitambagan sab niini ang publiko nga limitado pa gihapon ang ilang Covid-test kits ug ila lamang kini nga gamiton sa mga naka-admit karon sa ospital ug dili kini mamahimong gamiton sa mga buot lamang nga magpa-check up.
