DAVAO CITY – Bisan nga pabiling gawasnon batok sa African swine fever (ASF) ang siyudad sukad bulan sa Agosto, gikanayon sa usa ka opisyal sa City Veterinarian’s Office (CVO) nga pabilin pa gihapon nga mihimo ug lakang ang dakbayan aron nga dili na subli pa nga makasulod ang ASF sa dakbayan ilabi na karon nga aduna nay mga lugar sa rehiyon ang apektado sa maong sakit nga mo-igo sa mga binuhing baboy.
Sumala pa kang CVO head Dr. Cerelyn Pinili nga ulahing natala ang kaso sa ASF dinhi sa dakbayan sa milabay nga Hulyo ning kasamtangan nga tuig sa Barangay Lumiad, Paquibato District diin usa ka baboy ang nagpositibo sa ASF.
Mikuha gilayon ang ahensiya ug blood sample sa pipila ka mga barangay diin ang uban niini ang negatibo.
Kahinumduman nga nahimong “ground zero” sa ASF dinhi sa Davao region ang Don Marcelino sa Davao Occidental diin daghanang mga binuhing baboy ang gipailalom sa culling.
