DAVAO CITY – Aron nga mapalig-on pa ang pagpangita sa mga gikatahapan nga nagpositibo sa covid-19 ingon man sa mga na-expose sa virus, nang-hire karon ug dugang pa nga mga contact tracer ang dakbayan.
Laraw sab sumala pa niini nga masubay gilayon ang pasyente nga dili dayon motubag sa higayon nga tawagan sa tracer. Sumala pa kang Michelle Schlosser, tigpamaba sa Davao City Covid-19 Task Force nga pipila sumala pa sa mga nahisgutan ang ipahimutang sa mga distrito sa dakbayan nga nakatala ug taas nga kaso sa covid-19 kini aron nga daling madala sa isolation facility ang mga nagpositibo.
Sa higayon nga maka-hire na ang lokal nga kagamhanan, gilayon nga ipailalom ang mga nahisgutan sa contact tracing training sa TESDA aron nga aduna kini igong kaalam sa ilang mamahimong trabaho.
Sa kasamtangan nagpadayon sab ang gipahigayon nga training sa lokal nga kagamhanan ngadto sa pribadong sektor aron nga mapadali sab ang contact tracing sa ilang han-ay.
Nanawagan sab si Schlosser sa mga indibidwal nga posibleng nakahimamat ug mga covid-19 positive patient nga mas maayong makiglambigit sa mga contact tracer ug kinahanglan nga mopailalom sa quarantine.
Tipik lamang kini human nga pipila ka mga indibidwal ang nag-ilis sa ilang numero, i-block ang number sa contact tracer, dili mohatag ug tukma nga address ug daghanan pa.
