DAVAO CITY – Nangandam pa gihapon ang dakbayan sa Davao sa pagsaulog sa ika-84th nga Araw ng Dabaw apan dili na kini sama sa milabay nga mga katuigan kini gumikan kay nagpabilin pa gihapon ang bahad sa Covid-19.
Sumala pa kang Mayor Inday Sara Duterte-Carpio, aduna nay plano ang lokal nga kagamhanan apan laoman nga tanan nga mga aktibidad ang himuon online.
Gikanayong susama lamang kini sa gipahigayon nga kadayawan sa milabay nga tuig diin pipila sa mga programa ang gihimo pinaagi sa online.
Kahinumduman nga sa milabay nga 2020 gikansela sa lokal nga kagamhanan ang pipila ka mga dagko nga events sa 83rd Araw ng Davao human ang global outbreak sa Covid-19.
Pipila sa mga programa nga naapektohan ang gilangkuban sa Pasiugdang Pagsaulog, Reyna Dabawenya, Ginoong Davao, Sayaw Pinoy, Kalingawan sa Sta. Ana, Hudyaka, Mutya ng Dabaw, Pasidungog, Araw ng Empleyado, Kanta Dabawenyo, Parada Dabawenyo, ug Datu Bago Awards.
Hinuon wala na mihatag pa ug dugang nga detalye si Mayor Inday kung unsa pa ang laoman sa Araw ng Davao celebration karong adlawa.
