DAVAO CITY- Otomatikong nakasulod ang dakbayan sa Davao sa “We Love Cities” Competition.
Kini human nga ma-shorlist ang syudad sa One Planet City Challenge sa World Wildlife Fund diin ang mga syudad ang gi-assess ug gi-rank base sa gihimo niining climate action initiatives partikular na mahitungod sa hisgutanang urban planning and development.
Nasayran nga pinaagi sa popularity vote ang pag-ila sa mamahimong winner sa maong kumpetisyon diin ang syudad nga makakuha og pinakadaghan nga ihap sa boto ang ilhong “Most Lovable City” in the world.
Kahinumduman nga nahimong kwalipikado ang syudad isip leading city in climate action sa tibouk nasud gumikan sa pipila ka mga big-ticket initiatives nga na-establisar ilalom sa Sustainable Environment priority agenda sa panggamhanan.
Lakip na niini ang pagpromotar sa zero-emission modes of transport pinaagi sa pagmugna og bike lanes ug bike lock-up spaces; pagdugang og daghan pang public green spaces pinaagi sa pagtukod og mga pampublikong parke; ug ang pagpaningkamot niini sa pagkonserba sa tubig pinaagi sa rehabilitation ug reforestation sa mga yuta palibot sa mga aquifers ug watersheds sa syudad.
Sa pikas bahin, gihangyo karon sa City Government of Davao ang katawhang dabawenyo nga i-boto ang syudad sa maong kumpetisyon. Aron maka-boto, gamita lang ang #WeLoveDavaoCityPH sa bisan unsa nga Facebook post or mamahimong ipadala ang inyong mga ideya ug rekomendasyon sa We Love Cities website.
