Nagbuhat og feasibility study ang usa ka opisyal sa Lokal nga panggamhanan ning Dakbayan sa Dabaw, aron maghimo og comprehensive transport masterplan, nga nagtan-aw sa mga isyu sa traffic ug pagpalambo sa public transportation sa syudad.
Gibutyag ni Atty. Tristan Dwight P. Domingo, Assistant City Administrator ug project manager sa bus project, nga ang maong pagtoun nagapadayon pa ug wala pa’y pinal nga desisyon.
Lakip sa maong gitun-an ang mga isyu sa transportasyon sa mga kasikbit nga syudad.
Ang feasibility study nga ginatawag usab og “Davao City Comprehensive Transport and Traffic Master Plan and the Arterial Urban Corridor of Metropolitan Davao Project” naglakip sa mga workshops aron tukion ang mga pamaagi sa pagpauswag sa giingon nga “active transport” susama sa paglakaw ug pagbisikleta, public transport, ug private car usage.
Usa sa mga kinahanglan pangandaman sa dabawenyo mao ang paglakaw padulong sa bus stops kung sugdan na ang Davao Bus Project, ilabi na nga init o makasinati og daot nga panahon ang Davao.
Gipasabot ni Domingo, nga ang kultura sa “door-to-door” transportation sa Pilipinas, susama sa mga trisikad, tricycle, ug taxi, nagpasabot nga ang mga tawo naanad og direktang serbisyo.
Ang usa pa ka dakong isyu mao ang panginahanglan sa pag-usab sa mga bicycle lanes, gumikan daghan ang nagagamit og bisikleta panahon sa COVID-19 pandemic.
Apan, ang mga dalan sa syudad dili angay alang sa pagbisikleta, ug ang pagpalit og yuta gikan sa mga landowners mihatag usab og kalisod sa pagpalapad sa mga kalsada.
Ang Davao Bus Project, nga ginalaoman nga mahulipan ang 7,000 Public Utility Jeepneys (PUJs) og 1,000 ka mga bus, naga-atubang usab og problema sa budget.
Kaniadtong 2024, ang syudad nagkinahanglan og P18 billion aron masugdan ang proyekto, apan P1.8 billion lamang ang gi-allocate sa national government.
Bisan pa man sa mga problema nga nasinatian, gipaniguro ni Department of Transportation-Project Office for Davao (DOTr-Davao) Project Evaluation Officer, Richard Villanueva, nga magpadayon gihapon ang maong proyekto.
Gisaysay usab ni Domingo, nga ang panginahanglanon sa pagkunhod sa mga ruta sa public transport sa syudad, ug gisugyot sa pagbahin sa mga long routes aron maminusan ang kabug-aton sa dagan sa trapiko.
Laraw usab niini ang pagpatuman og strikto nga polisiya sa private car ownership, susama sa “no garage, no car” policy.
Ang usa pa sa kinahanglanon mao ang pag-update sa Zoning Ordinance sa syudad, ilabi na sa lugar sa mga warehouses, nga kinahanglan ibutang sa industrial zones imbis sa urban areas.
Samtang, usa sa mga nakita sa Local Government Unit (LGU) aron matubag ang mga isyu sa traffic, mao ang paghatag og prioridad sa pipila ka infrastructure projects, lakip niini ang Sta. Ana Wharf Development, ang Bus Terminal Project, ug ang Davao River Ferry.
Ang uban pang mga inisyatibo naglakip sa Peak Hours Augmentation Bus Service (Phabs), ang Davao Interim Bus Service (DIBS), ug mga pagpa-uswag sa mga traffic signals ug signage.
Kahinumdoman, nga ang Davao City anaa sa ikawalo sa labing trapik nga syudad sa kalibutan sumala kini sa Tomtom Traffic Index, nga ang mga commuters sumala pa magkinahanglan og 33 minutos aron makabiyahe og 10 kilometros, nga mas taas tandi sa Manila nga adunay 32 minutos.
