DAVAO CITY – Subling mohatud ug hinabang ang City Government of Davao ug laing batch sa financial assistance sa mga area sa Luzon nga grabeng naapektohan sa pagkuso-kuso sa Bagyong Ulysses.
Una ng napalabang sa 19th City Council ang resolution nga gihangyo sa Mayor nga mag-alokar ug P6.5 million sa 11 Typhoon Ulysses-affected areas.
Subay sa breakdown, ang probinsiya sa Cagayan, Camarines Norte, Isabela ug Quirino ang makadawat ug tig-P1 million, samtang ang mga siyudad sa Tuguegarao sa Cagayan, ug Marikina sa Metro Manila ang makadawat ug tig-P500,000.
Samtang ang munisipalidad sa Real ug Patnanungan sa Quezon Province, San Mateo ug Rodriguez sa Rizal ang hatagan ug tig-P300,000.
Ang tanan nga mga areas ang gipailalom karon sa state of calamity nga hatud sa Bagyong Ulysses.
Samtang ang munisipalidad sa Claveria sa Cagayan ang makadawat sab ug P300,000 gikan sa City Government human ang pagkuso-kuso sa Bagyong Quinta.
Gamiton sa lokal nga kagamhanan ang portion sa 30 percent Quick Response Fund gikan sa 5 percent sa Disaster Risk Reduction and Management Fund (Calamity Fund) sa City Government alang sa tuig 2020.
Kahinumduman nga una na sab nga mi-alokar ang lokal nga kagamhanan ug P9.1 million sa mga dapit nga apektado sa pagkuso-kuso sa Bagyong Quinta ug Rolly.
Una na sab nga misaad si Mayor Sara Duterte-Carpio nga magpadayon matud pa ang siyudad sa paghatag ug financial assistance ngadto sa mga kasikbit nga probinsiya bisan pa nga padayon sab nga nakigbatok karon ang dakbayan sa taas nga kaso sa Covid-19.
