DAVAO CITY – Dungan sa padayon nga pagpaningkamut sa dakbayan sa Davao aron nga batukan ang Covid-19, gipasalig ni Mayor Sara Z. Duterte nga aduna sumala pay igo nga resources ang siyudad alang sa libre nga swab testing alang sa mga dabawenyos diin kabahin pa gihapon kini sa surveillance activities.
Sumala sa Mayor nga makapangita pa gihapon ang dakbayan ug pondo alang sa nagpadayon nga testing activities aron nga daghanan pa ma-detect nga posibleng nagpositibo sa Covid-19 ug mapugngan ang transmission niini.
Gimandoan na sab ni Mayor Inday ang mga district health offices nga i-activate ang ilang mga swabbing corners aron nga mapalig-on pa ang kampanya sa dakbayan batok Covid-19.
Kahinumduman nga gilugwayan hangtud kagahapon ang drive-thru swab testing sa mga pampublikong utility vehicle drivers ug delivery services drivers sa Crocodile Park nga natapos na unta sa milabay nga Sabado.
Plano karon sa lokal nga kagamhanan nga magdugang pa ug swabbing sites sa downtown area aron nga makaakomodar pa ug daghanang mga indibidwal ug ma-decongest ang Sta. Ana Health Center, nga maoy main swab center sa dakbayan.
