DAVAO CITY – Nakighiusa ang dakbayan sa Davao sa kasaulogan sa International Women’s Day kagahapong adlawa.
Tumong sumala pa niini nga ilhon ang mga nahimong kontribusyon sa kababaenhan dili lamang sa katilingban kung dili lakip na sa gender equality ug empowerment.
Sumala pa kang Integrated Gender and Development Division head Lorna Mandin, magpadayon ang lokal nga kagamhanan sa paghatag ug kasulbaran sa mga nagkadaiyang isyu ilabi na sa domestic violence.
Una niini, adunay gipahigayon ang lokal nga kagamhanan nga aktibidad diin nanagtapok ang mga kababaenhan sa milabay nga Marso 4 dungan sa 22nd City Wide Women’s Summit diin ang mga kababaenhan mihatag sa ilang nagkadaiyang opinyon sa kasamtangan nga mga isyu nga ilang gi-atubang.
Pipila sa mga nahisgutan ang adunay kalabutan sa economic, political, health ug education. Gikanayong ang gihimong panagtapok nagsilbi nga venue sa mga agenda sa kababaenhan diin ilang isumite ang ilang mga namugna nga mga programa ug polisiya ngadto sa buhatan sa Mayor ug Bise Mayor nga dakong tabang sa mga kababaenhan sa dakbayan.
Una na sab nga gitambongan ang maong tigum sa mga miyembro sa LGU, barangay, ug non-government organizations.
Adunay partisipasyon usab ang mga kalalakin-an kini base na usab sa Men’s Responsibility on Gender and Development (Mr. Gad) ordinance diin kinahanglan nga musalmot ang mga nahisgutan sa women’s summit.
Samtang gipakita sab ni Mandin ang data sa mga natalang domestic violence cases sa siyudad diin mas ubos ang ilang natala kung itandi kaniadtong pre-pandemic years.
