DAVAO CITY – Daghanang opisyal sa lokal nga kagamhanan, mga kanhi kaubanan ug mga higala sa trabaho ang nagpadangat sa ilang pahasubo sa kamatayon ni kanhi Davao Tourism Association (Data) president Renato “Gatchi” Gatchalian, nga una ng mipanaw kagahapong adlawa, Marso 9 sa edad nga 56 anyos.
Kahinumduman nga gikumpirma mismo sa iyang anak nga si Micaela pinaagi sa Facebook post ang kamatayon niini.
Wala na sab gibutyag ang hinungdan sa kamatayon sa iyang amahan.
Pipila sa mga nagpadangat ug pahasubo sila si Data president Cherry Al-ag, konsehal Myrna Dalodo-Ortiz, head sa committee on tourism ug City Tourism Operations Office (CTOO) Head Generose Tecson.
Kahinumduman nga dakong tabang si Gatchi sa siyudad gumikan kay naghupot kini ug pipila ka mga dagkong aktibidad sa dakbayan sama na lamang sa Davao Pasko Fiesta, Kadayawan Festival, first Ginoong Davao 2019, Davao Film Tourism, ug daghanan pa.
Gipahiluna ang patay’ng lawas niini sa Cosmopolitan Memorial Chapels Davao, Trevi Room sugod karung adlawa hangtud na sa adlaw nga domingo.
