DAVAO CITY- Wala gipanghimakak sa Department of Trade and Industry- Davao City Field Office nga adunay mga establisyemento sa dakbayan nga misupak sa Suggested Retail Price (SRP) labi na sa mga nag unang palaliton sa merkado.
Gibutyag sa city director sa DTI-Davao City Field Office nga si Rachel Remitio, adunay 31 ka mga establisyemento ang kasamtangan nila nga gina-monitor.
Kini ang gilangkuban sa mga supermarkets, grocery stores ug uban pa kung asa muabot matud sa kapin 200 ka mga items ang gina review sa buhatan.
Dugang pa sa opisyal, dili tanang produkto ang dungan nga milapas sa SRP, apan subay sa ilang pag monitor, lahi-lahi ang ilang makita.
Gikanayong halos tanang establisyemento na ang na-isyuhan og letter of inquiry aron patubagon kung nganong milapas ang presyo nila sa SRP.
Sa pikas bahin, miangkon ang DTI nga adunay manufacturers sa mga nag-unang palaliton ang mihangyo nga usbawan pag usab ang suggested retail prices sa mga produkto.
Dugang pa ni Remitio, daghanay na ang petisyon nga nadawat sa ilang central office nga subling patas-an ang presyo may kalabutan usab sa pagsaka sa presyo sa raw materials, kana dala sa pag-ubos sa bili sa piso kontra dolyar.
Kahinumduman nga bulan sa Agosto ning tuig kasamtangan ulahing gipagawas ang SRP sa nag unang palaliton.
