DAVAO CITY – Daghanang mga buot mukandidato sa local positions sa Dakbayan sa Dabaw ang miapas sa deadline sa filing sa Certificate of Candidacy kagahapong adlawa.
Gani, adunay duha ka mayoralty candidates ang nadugang sa listahan human nag-file sila Teodoro Mantilla ug Ruy Elias Lopez.
Tulo na ang kandidato alang sa pagka-1st District Representative human nagduso og COC si Maria Victoria Maglana aron mamahimong Kongresista sa Unang Distrito.
Tulo na sab karon ang mag-atbangay alang sa pagka-2nd District Representative human nga miapas si Alberto Dulong kagahapong adlawa.
Head-to-head match usab ang mahitabo sa 3rd District human nga mupapili si Abundio Indonilla aron hagiton ang incumbent nga si Rep. Isidro Ungab.
Sa pikas bahin, upat ka kandidato ang nadungag sa mga buot mupapili isip 1st District Councilor, nga gilangkuban nila Lyndon Diems Banzon, Allan Halog, Randy Ponteras, ug Jovanie Mantawel.
Siyam ang nadugang sa 2nd District candidates alang sa pagka-Konsehal nga mao sila Al Ryan Alejandre, Louie John Bonguyan, Marissa Abella, Diosdado Mahipus, Edgardo Batenga, Roseller Bantugan, Crispin Galang, Paola Isabelle Salvador, ug Joel Bustamante.
Samtang, si Carmelo Clarion lang ang nadugang sa mga kandidato pagka-Konsehal alang sa 3rd District.
Nagpasabot ang COMELEC nga wala nay extension nga mahitabo alang sa COC filing.
