DAVAO CITY – Ginaaghat karon sa lokal nga panggamhanan sa Dakbayan sa Davao ug sa Department of Health Davao Region ang katawhan nga wala pa nabakunahan o di kaha wala pa nakadawat og second dose nga musalmot sa ipahigayong national vaccination days sa nasud nga gitawag og “Bayanihan Bakunahan” nga mulungtad gikan sa umaabot nga Lunes, Nobyembre 29, hangtod Miyerkules, unang adlaw sa Disyembre.
Kinahanglan lamang dad-on sa mga mag-first dose ang ilang SafeDavaoQR code, valid ID, ug kaugalingong ballpen.
Sa mga mag-second dose ug dunay missed dose, vaccination card ang dad-on.
Sa mga eligible nga menor de edad sa pediatric vaccination, kinahanglan nga dalaon ang birth o baptismal certificates, valid ID, Barangay Certificate o Special Power of Attorney of guardianship kung legal guardian ang mukuyog, ug medical clearance nga gi-issue sa pediatrician alang sa mga dunay comorbidities.
Gikanayon sa labaw sa Davao City Vaccination Cluster nga si Dr. Josephine Villafuerte nga abli ang tanang vaccination sites sa Dakbayan, lakip na ang mga gina-operate sa pribadong sektor, gikan alas 8 sa buntag hangtod alas 3 sa hapon.
Pagadawaton usab ang mga walk-in vaccinee.
Dungan niini, magpadayon usab ang mobile vaccination nga gipaluyuhan sa Sangguniang Panlungsod ubos sa Opisina sa Bise Alkalde.
Nagalaum si Villafuerte nga makatabang kini sa pagkab-ot sa Dakbayan sa target vaccinated population nga 1.2 million alang sa herd immunity.
Sa ulahing datos gikan sa iyang cluster, lapas 1 million na ang partially-vaccinated samtang kapin 900,000 na ang fully-vaccinated dinhi sa Dakbayan sa Davao.
