Nagpahinumdom karon ang Department of Agriculture XI ngadto sa publiko nga batason gayud ang pag beripika sa mga makitang post online.
Kini human sa nikatag nga balita kabahin sa matud pa kakulangon sa bugas dinhi sa dakbayan sanglit adunay mga konsyumante matud pa ang wala nay mapalitan.
Sumala pa ni Department of Agriculture Regional Director Macario “Bong Gonzaga” nga mahinungdanon karon “fact-checking” aron dili makahatag og kalisang sa kadaghanan.
Pagpaklaro pa ni Gonzaga nga walay shortage sa bugas dinhi sa syudad gumikan daghan kini og suplay subay sa ilahang gihimong imbentaryo.
Sa datos gikan sa National Plant Quarantine Services (NPQS) adunay 3,465 metric tons (MT) o 69,300 ka mga sako ug 50 kilos matag sako sa bugas ang bag-ohay lamang niabot sa Port of Davao.
Gikumpirma sab sa National Food Authority-XI (NFA) nga aduna pay igo nga bufferstock busa walay angay kabalak-an.
Sa karon nag-awhag ang opisyal sa mga katawhan nga nakasinati ug kalisod sa pagpalit ug bugas nga mokontak gilayon sa ilahang buhatan aron dali kini maaksyunan.
