Gisusi karon sa Department of Agriculture (DA) ang posibilidad sa pagbaligya sa P20 kada kilo nga bugas sa mas daghang lugar sa nasud.
Kabahin kini sa lakang sa ahensya aron makahatag ug barato nga bugas sa mas daghang lugar sa Pilipinas.
Base sa datos sa DA, miabot na sa hapit 80 ka KADIWA o Katuwang sa Diwa at Gawa para sa Masaganang Ani at Mataas na Kita nga mga center ang nagabaligya og bugas nga tag-P20 kada kilo.
Apil sa mga lugar nga adunay KADIWA center mao ang Cebu ug Bacolod, samtang gikatakda nga mosunod ang Bohol, Camarines Sur, San Juan ug Navotas City sa Metro Manila.
Kini nga inisyatibo angka sa tumong sa gobyerno nga paubson ang presyo sa commercial nga bugas sa merkado, usa sa mga saad ni Pangulong Ferdinand Marcos Jr.
Gitinguha sa ahensya nga masugdan ang tibuok-nasud nga implementasyon sa Enero 1, 2026.
Sa pagkakaron, mapalit ang P20 kada kilo nga bugas sa mga KADIWA Centers ug sa mga lokal nga kagamhanan.
