Nagpatuman og temporary nga import ban ang Department of Agriculture sa mga importasyon sa mga baka gikan sa Japan gumikan sa outbreak sa Lumpy Skin Disease (LSD).
Ilalom sa memorandum order no. 57, temporaryo gipahunong ang pag-angkat sa mga produkto sa baka gikan sa Japan gumikan sa maong sakit.
umala ni Agriculture Secretary Francisco Tiu Laurel Jr., ang temporary ban gipahigayon aron malikayan nga magka-sakit usab ang mga baka sa nasud ug maprotektahan ang populasyon niini batok sa LSD.
Ang LSD usa ka sakit nga magsugod sa panit sa baka nga magmugna og mga nagtubig nga bukol nga mamahimong hinungdan sa pagkamatay sa mga baka.
Dali nga gipahibalo sa mga otoridad sa Japan ang mga insidente sa maong sakit sa World Organization for Animal Health ug dali ra nasuta ang mga lugar nga Fukuoka ug Maebaru nga mao ang labing dako nga apektado niini.
Bisan pa man niini, adunay mga produkto nga dili kabahin sa ban basta kini mag-agi sa polido nga proseso sa Philippine import and health standards.
Lakip niini ang mga skeletal muscle meat, casings, collagen, mantika, blood meal ug flour, mga bukog sa baka, ug pasteurized nga gatas.
Padayon gihapon ang mga lakang sa ahensya aron bantayan og maayo ang livestock industry sa nasud alang sa mga posible nga hulga sa LSD.
