Nagpahayag og kabalaka ang Department of Agriculture (DA) sa posibleng epekto sa sektor sa agrikultura sa Pilipinas tungod sa nagkagrabeng tensyon tali sa US ug Iran.
Sumala ni Agriculture Secretary Francisco Tiu Laurel Jr. posible nga magdala kini og pagsaka sa presyo sa lana nga direktang makaapekto sa kantidad sa petroleum-based fertilizers, gasto sa transportasyon (freight costs), ug fuel alang sa farm machinery ug mga bangkang panagat.
Gilakbitan usab niini ang Strait of Hormuz, diin nagalihok ang daghang bahin sa global oil supply.
Bisan unsang kalihukan o disruption niini mamahimong mosaka ang presyo sa global crude ug makahatag og kalit nga kausaban sa supply chains sa commodities.
Dugang pa sa kalihim, tungod kay import-dependent ang sistema sa agrikultura sa Pilipinas, posible nga mosaka ang gasto sa fertilizer, trigo, ug animal feed, nga sa ulahi makaapekto sa presyo sa pan, manok, ug baboy.
Nagpabilin karon nga nagbantay ang DA aron maprotektahan ang food security ug mabalanse ang interes sa mga producers ug consumers.
