Gipasalig sa Department of Agriculture (DA) ug sa Food Terminal Inc. (FTI) nga igo ang supply sa bugas nga anaa sa gobyerno aron mapadayon ang Benteng Bigas Meron Na (BBM) program.
Sumala ni Agriculture Secretary Francisco Tiu Laurel Jr., nagpadayon ang National Food Authority (NFA) sa pag-replenish sa ilahang mga stock aron masiguro nga padayon nga pagbaligya sa bugas sa Kadiwa Stores, nga karon abri na sa nagkadaiyang bahin sa nasud.
Matod pa niya, nasabtan sa ilahang ahensya nga ang nagpadayon nga armadong panagbangi sa Tungang Sidlakan mahimong makapukaw og kabalaka o stocking anxiety, ilabina sa mga kabahin sa vulnerable sector.
Apan gibutyag sa kalihim nga ang pagpalit tungod sa kahadlok o panic buying mahimo lamang nga makapasamot sa sitwasyon.
Gipaklaro pa ni Tiu Laurel nga adunay igo nga buffer stock sa nasud tungod usab sa maayong ani karong tuiga.
Busa, dili angay mabalaka ang publiko, ilabina ang mga benepisyaryo sa programa, gumikan magpadayon ang distribusyon sa bugas ilawom niini basta rehistrado sa Benteng Bigas Registry System.
Samtang, aron malikayan ang hoarding, hugot nga gipatuman sa departamento ang limitasyon nga hangtod 10 kilo nga bugas lamang kada adlaw matag benepisyaryo ang mahimong mapalit ilawom sa maong programa.
