Gisiguro ni Agriculture Secretary Francisco Tiu Laurel Jr. nga maningkamot ang Department of Agriculture (DA) aron mapadayon ang pagkunhod sa presyo sa pagkaon ug mapugngan ang pagsaka sa inflation sa nasud.
Kini human sa report sa Philippine Statistics Authority nga nagkanayon nga mikunhod sa 0.9% ang inflation karong Hulyo tungod sa padayon nga pagbarato sa presyo sa pagkaon, lakip na ang 15.9% nga pagkunhod sa presyo sa bugas ug mais.
Matod ni Secretary Tiu Laurel, sunod nga atubangon sa DA ang isyu sa presyo sa bugas ug baboy aron magpabiling kontrolado ang food inflation.
Niadtong Hulyo 16, gipaubos sa DA ang maximum suggested retail price (SRP) sa 5% broken imported rice gikan ₱45 ngadto ₱43 matag kilo.
Samtang, nagpabiling mahal ang presyo sa baboy tungod sa epekto sa African Swine Fever (ASF). Sumala pa sa opisyal, gitumong sa gobyerno nga mamahimong magamit ang bakuna batok ASF sa dili pa matapos ang tuig ug usisahon usab ang mga palisiya sa pag-angkat og baboy.
