Gisugdan na sa Department of Agriculture (DA) ang pagbaligya og bugas nga nagkantidad og P20 matag kilo sa Sugbo, subay sa pagsaulog sa Adlaw sa mga Mamumuo ning unang adlaw sa Mayo.
Gipangulohan mismo ni Agriculture Secretary Francisco Tiu Laurel Jr. ang pagbukas sa publiko sa P20/kilo nga bugas isip pormal nga pagsugod sa programa sa Cebu.
Sa usa ka pamahayag, gisaysay sa kalihim nga karong Labor Day, gituman ni Pangulong Ferdinand Marcos Jr. ang iyang saad sa miaging tulo ka tuig sa wala pa siya mapili nga ihatod ngadto sa mas ubos nga presyo ang bugas, aron mahimong mas abot-kaya alang sa mga ordinaryong Pilipino.
Kauban niini, napirmahan usab ang usa ka memorandum of agreement tali sa Food Terminal Inc. ug sa Provincial Government sa Cebu alang sa pilot testing sa ilang probinsya hangtod Disyembre karong tuiga.
Gilauman nga mapuslan kini sa kapin 800,000 ka mga pamilya o tugbang sa dili moubos sa 4 ka milyon ka mga indibidwal.
Samtang, hangtod karon, nagpaabot gihapon ang departamento sa tubag gikan sa Commission on Elections (Comelec) kabahin sa ilang hangyo nga ma-exempt sa public fund spending ban nga magsugod ugma, Mayo 2, hangtod Mayo 12 nga mao ang petsa mismo sa eleksyon.
