DAVAO CITY – Nagpadayon karon ang pagpaningkamut sa Department of Agriculture (DA) – 11 aron lamang mahatagan ug ayuda ang mga hog raisers sa davao region nga apektado sa nagpadayon nga suliran sa African Swine Fever (ASF).
Kahinumduman nga aduna pa gihapoy pipila ka mga lugar sa Davao region ang labing naapektohan sa ASF hinungdan nga daghanan sab ang nawad-an ug panginabuhian.
Usa sa mga naapektohan ang lugar sa Talicud island sa Island Garden City of Samal diin ubay-ubay na ka mga binuhing baboy ang gipailalom sa culling.
Sa kasamtangan, pabilin nga ginadili ug pagpasulod ug mga binuhing baboy ingon pork based products sa isla kini aron masiguro nga dili na mograbe pa ang suliran sa ASF.
Una na sab nga gibutyag ni IGACOS Mayor Al David Uy, nga aduna silay gigahin nga pundo alang sa mga apektado nga mga hog raisers.
Gawas sa baboy, laraw sab sa lokal nga kagamhanan sa Samal nga hatagan ug alternatibong mga hayop ang mga apektadong residente nga mamahimo nila nga alimahan.
