DAVAO CITY – Naglaom ang Department of Agriculture (DA) 11 nga dili mohatud ug grabe nga epekto ang pag-igo sa El Niño ug summer season ilabi na ngadto sa mga mag-uuma.
Una ng gibutyag sa Pag-asa nga weak El Niño ang nasinatian karong panahona nga nakaapekto sa pipila ka mga mag-uuma partikular na sa lalawigan sa Davao del Sur.
Sumala pa kang Roy Jose Pascua, focal person sa Disaster Risk and Reduction Management of the Department of Agriculture XI nga ulahing nasinatian ang grabe nga El Niño ug dry season sa nasod kaniadtong tuig 1997 ug nasundan kaniadtong 2015 dry spell phenomenon.
Hinuon gipasalig ni Pascua nga ang nasinatian nga phenomenon karong panahona ang mas hinay ug dili na mohatud ug grabe nga epekto.
Sa kasamtangan ang DA XI-DRRM padayon nga nagpahigayon ug close monitoring sa tanan nga mga apektadong probinsiya sa Davao region partikular na sa mga munisipalidad sa Bansalan, Matanao, Hagonoy, Kiblawan ug Magsaysay.
