DAVAO CITY – Gipasalig sa ahensiya sa Department og Agriculture (DA) 11 nga hatagan nila ug ayuda ang mga hog raisers sa Island Garden City of Samal human ang ilang gipahigayon nga total depopulation sa mga binuhing baboy sa isla gumikan sa nagkagrabe nga kaso sa African Swine Fever (ASF).
Laraw sab sa maong lakang nga mapugngan ang pagdayon nga pagsaka sa hog virus sa isla.
Sa kasamtangan hugtanon una nga gidili pagdala ug mga buhi nga baboy ingon man nga pork product patabok sa Samal hangtud nga nagpabilin ang bahad sa ASF.
Una ng gibutyag ni Armie Capuyan, ASF focal person sa DA-11 nga anaa sa kinatibuk-ang 4,308 ka mga baboy gikan sa upat ka mga barangay sa isla ang gipailalom na sa culling hinungdan nga anaa sa 701 ka mga hog raisers ang apektado.
Kahinumduman nga sa milabay nga tuig ubay-ubay ka mga barangay sa Davao region kalakip na ang dakbayan sa Davao ang apektado usab sa ASF apan dili pa gihapon mokumpiyansa karon ang dakbayan bisan nga unom ka bulan na nga walay natala nga kaso sa ASF.
