Anaa na sa kostudiya sa mga otoridad ang tulo ka mga suspetsado human nga nadakpan kini atol sa gihimong pagronda sa hiniusang pwersa sa NBI Southeastern Mindanao Regional Office XI kauban ang Anti Human Trafficking Division (HTHRAD), sa NBI Main office ug DSWD XI.
Tumong sa maong pagronda aron nga bungkagon ang gikaingon nga Cyber Sex Trafficking Den nga nahimutang sa Brgy. San Jose, Lupon, Davao Oriental. Gipahigayon ang operasyon pasado alas Onsi ang takna sa udto nga miresulta sa pagkasikop nila alyas Jackylou, 31 anyos ug ang bana niini nga sa alyas Victor, 34 anyos ug maguwang niini nga si Alyas Alberto, 40 anyos, nga tanan mga residente sa nasampit nga lugar. Sumala pa sa Team Leader Agent nga si Kirk Pedro, gibutyag niini nga ang tulo ka mga dinakpan nagadumala sumala pa og Online Sex Trafficking nga ang mga gigamit niini nga mopasundayag og mga menorde-edad nga anaa lamang sa 13 anyos paubos ang pangedaron.
Nadawat sumala pa niini ang report kabahin sa iligal nga kalihukan hinungdan nga ilaha kining giaksyunan. Atol sa nasampit nga operasyon, nakumpiska sa mga operatiba sa NBI HTHRAD ug NBI SEMRO ang nagkadaiyang mga kagamitan susama sa mga computer, video camera, mga cellphone, mga suga ug uban pa nga mga kagamitan sa ilahang iligal nga transaksyon. Nasayran sa mga otoridad nga ang mga suspetsado mag video record live samtang ginahimo sa mga menor de edad ang malaw-aw nga mga buhat bugti ang salapi gikan sa ilahang mga langyaw nga parokyano sa nagkadaiyang bahin sa langyaw nga kanasuran.
Dugang pa sa mga otoridad, ang usa sa mga menor de edad ang anak sa mga magtiayon nga dinakpan nga nag-edad og Onsi anyos. Sa pagkakaron ang mga menor de edad ang gipailawom na sa medico legal check up sa Davao Oriental Medical Center uban ang kawani sa DSWD XI. Samtang gikatakda usab nga pasakahan og kaso ang mga suspetsado karong adlawa sa piskalya.
