DAVAO CITY – Gikasuhan ni Davao del Norte District 2 Board Member Orly Amit si Governor Edwin Jubahib og Cyber Libel gumikan sa akusasyon sa gobernador nga pagpangawat og pondo sa lokal nga panggamhanan.
Nasayran nga kagahapong adlawa lamang dihang nagpasaka og reklamo si Board Member Amit sa City Prosecutor’s Office sa Island Garden City of Samal.
Gidawat mismo ni City Prosecutor Joseph Apao ang gi-file nga kaso ni Amit batok sa gobernador.
Sumala sa bokal, walay basehanan matud pa ang mga akusasyon batok kaniya.
Una pa niana, gibutyag atubangan sa Sangguniang Panglalawigan nga anaa sa kapin P69.8 million ang gipangayo ni Jubahin nga pondo sa probinsya alang sa tuig 2024.
Apan wala nahiuyon niini ang mga myembro sa Sangguniang Panlalawigan gumikan sa daghanan pang mga proyekto nga ihatag ilawom sa aprubadong P2.5 billion nga pundo alang sa musunod nga tuig.
Nasayran nga gipamubsan lamang sa Sangguniang Panglalawigan ang confidetial funds sa Office of the Governor aron idungag sa mga proyekto alang sa mga hilit nga barangay sa lungsod sa San Isidro.
Hinuon, nadungagan ang budget sa Provincial Social Welfare Development Office nga unang gigahinan og 2% nga budget sa gobernador.
Gipasalig sab sa bokal nga madungagan ang ihap sa mga sweldo sa mga Job Order Workers sa Executive Department nga sumala pa, unom ka bulan lamang nga sweldo alang sa gobernador.
Nasayran nga niadtong milabayng bulan lamang dihang gihagit ni Board Member Amit ang gobernador nga pamatud-an ang mga alegasyon batok kaniya.
Sumala pa, makatagamtam ang gobernador og bugnaw nga selda kon mapakyas kini sa iyang pagpamatuod sa mga alegasyon.
