DAVAO CITY – Hugtanon karon ang gihimong pagmonitor sa buhatan sa City Veterinarian’s Office sa mga palengke ning dakbayan ilabi na ang mga ginabaligya nga mga karne dungan sa nagkaduol nga pagsaulog sa kapaskohan diin laoman nga adunay pagsaka sa demand niini.
Sumala pa kang Cerelyn Pinili, head sa CVO, anaa sa duruha ngadto na sa tulo ka higayon matag semana ang ilang ginapahigayon nga pagmonitor sa mga palengke kini aron masiguro ang kalidad sa mga karne nga ginabaligya ug ang kalimpiyo sa palibot diin kini gipahimutang.
Kalakip sab sumala pa sa ilang mga ginabisita ang mga lechon house nga sagad sab dagsaon panahon sa holiday season.
Hinuong gikalipay ni Pinili nga sagad sa mga nagabaligya ug mga karne ang adunay gihuptan nga certificate.
Gitataw sab sa nahisgutan nga aduna silay gikumpiska nga mga karne sa may Leon Garcia Agdao diin nagmatada lamang ug karne sa ilang area nga makonsidera sumala pa nga hot meat.
